Monday, October 11, 2010

Karadjawan nan Surigao

Jaon nay Night café sa Surigao kada biernes sanan sabado nan duyom didto sa Boulevard. Bagan an City government man an nagpasiugda nan ini na karadjawan. Sa ako tan-aw, maradjaw man sab na jaoy kapanawan nan mga tawo pagkahuman nan isa ka semana na pag-trabaho, dakan sab na jaoy  panahon na mag-suroy-suroy sanan makig-iban sa pamilya nan maglulinghayaw kaysa puro ra sab trabaho na waya nay panahon sa pamilya. Arang gajod ka gana an night café nan Surigao City kay jaon ra sa kilid nan dagat, (an problema kun mabayod, bagan pisik man, inday unhon jaon?!?) an ija ka presko sanan kahayay na imu mabati samtang kaw nag lingkoray sa kilid di gajod ikabaylo. Isa na ako ganahan kay arang ka hamuk mga police ug Civil security unit nan syudad jaon gajod kanunay nagbantay sa mga tawo. Bagan makasiguro kay na wayay mga problema na mahitabo (ajaw sab lamang pag-kumpiansya!) Magana isab na mukaon sa mga pagkaon kay karagjaw man na mga catering services owner an tag imbetar na mutukod nan ila pwesto dakan kon ganahan kaw mukaon jaon dajon imu makan-an… Kuyang lamang nan mga kalingawan kinta. Mas magana siguro kon jaoy sab mga banda na magtukar o di ba kaha amateur singing contest o bisan unu rakan na makalingaw sab sa ato. An ako lamang panghinaut na magpabilin gihapon an kalinaw, kahapsay sanan kalimpyo nan syudad nan surigao. Tana mulambo sanan bibo pa an surigao, ini mahimu lamang kun kita isab na mga lumad na taga surigao mukooperar ug mutabang sa mga programa nan nagdaya nan ato syudad.

Jari na, Iswag SURIGAO!